Kismaayo (Halqaran.com) – Madaxweynaha Jubbaland mudane Axmed Maxamed Islaam ayaa tacsi tiiraanyo leh u diray qoyska, qaraabada iyo guud ahaan ummadda Soomaaliyeed, geeridii ku timid Allaha u naxariistee xildhibaan Cabdi Xasan Xiish oo ka tirsanaa Baarlamaanka Jubbaland kaa oo Kismaayo ugu geeriyooday xanuunka COVID-19.
Madaxweynaha ayaa tilmaamay in marxuum Cabdi Xasan Xiish uu kaalin muhiim ah ku lahaa dowladnimada Jubbaland isaga oo ka soo shaqeeyay heerar kala duwan sidoo kalena mar walba u taagnaa midnimada bulshada.
“Allaha u naxariistee xildhibaan Cabdi Xasan Xiish wuxuu ahaa shaqsi alle ka cabsi leh oo mar walba u taagnaa sidii loo xoojin lahaa dowladnimada isaga oo laba mar oo hadda u dambeysay ahaa xildhibaan intii uu shaqadaan hayey ku suntanaa xilkasnimo” ayuu yiri madaxweyne Axmed Madoobe.
Madaxweyne Axmed Maxamed Islaam ayaa marxuumka Alle uga baryay in uu hoygiisa ka yeelo Jannatul Fardowsa, samir iyo iimaanna uu ka siiyo qoyska, qaraabada iyo guud ahaan ummadda Soomaaliyeed ee uu ka baxay.
Xafiiska wararka Halqaran.com
Halqarannews@gamil.com
