Gaalkacyo (Halqaran.com) – Wasiirka Amniga Maamulka Galmudug, Axmed Macalin Fiqi ayaa sheegay inuu ka badbaaday isku day dil oo Al-Shabaab ay la damacsanaayeen, kadib markii Al-Shabaab ay qorsheeyeen miino inay ku dhajiyaan gaarigiisa.
Wasiir Fiqi oo Saxaafadda kula hadlay Magaalada Gaalkacyo ayaa sheegay inay ka hortageen qorshahaasi, islamarkaana gacanta lagu soo dhigay shaqsigii damacsanaa inuu miinada ku dhajiyo gaariga Wasiirka amniga Galmudug.
Wuxuuna sheegay in Ciidamada ay qabteen Nin ka tirsanaa Al-Shabaab oo Magaciisa ku sheegay Aweys, kaas oo uu sheegay in uu doonayay in uu fuliyo falal amni darro.
Wasiirka Amniga Galmudug ayaa sheegay Amiir ka tirsanaa Ururka Al-Shabaab inay toogteen Ciidamada, kadib markii la isku dayay in gacanta lagu soo dhigo, balse uu dagaalamay, maadaama uu haystay Bistoolad islamarkaana Ciidamada ammanka uu la dagaalay.
Qorshaha Al-Shabaab ayaa wuxuu ku sheegay inay tahay inay laayaan dadka haldoorka u ah Maamulka Galmudug ee dhaq dhaqaaqa u wada, waxaana uu sheegay shacabka Galmudug in laga doonaayo inaysan gabaad siin Al-Shabaab.
Si kastaba ha’ahaatee, deegaannada Maamulka Galmudug, ayaa waxaa ka bilowday hawlgal Wasaaradda Amniga Galmudug ay kula dagaalameyso Al-Shabaab, sidoo kalena Ciidamada maleeshiyaadka Galmudug jooga lagu qarameynaayo.
Xafiiska Wararka Halqaran.com
Halqarannews@gmail.com
