Muqdisho (Halqaran.com) – Wasaaradda qorsheynta Soomaaliya iyo ururka Midowga Yurub ayaa maanta kala sixiixday heshiis ballaaran oo uu rurku ku maalgelinayo Soomaaliya
Hashiiskan oo labada dhinac ay ku kala matalayeen wasiirka Qorsheynta Soomaaliya, Jamaal Maxamed Xasan, iyo agaasimaha guud ee midawga Yurub ee horumarinta caalamiga ah Stefano Manservisi.
Labada dhinac ayaa kala sixiixday heshiis dib loogu dhisayo waddooyin ku kala yaalla Muqdisho iyo Berbera kaasoo ay ku kacay 23 milyan oo Yuuroo.
Mashruucan oo la magac baxay Injineer Yariisow ayaa loogu magac daray guddoomiyihii hore ee gobolka Banaadir Injineer Cabdiraxmaan Cumar Cusmaan Yariisow
Mashruuca Eng Yariisow qaybtiisa Muqdisho oo lagu maal gelinayo 15 Milyan oo Yuuro ayaa si casri ah loogu dhisayaa wadda dhirirkoodu dhanyahay 17 KM, iyada oo qaybtiisa Berbera, looga shaqeynayo xoojinta awoodda dowladaha hoose ee qorshaha horumarinta magaaleynta iyo horumarinta dhallinyarada.
Munaasabadda lagu saxiixay heshiiska waxaa goob joog ka ahaa Ra’iisul Wasaare Xasan Cali Khayre, guddoomiyaha gobalka Banaadir, safiirka midawga Yurub ee Soomaaliya Ambassador Nicolas Berlanga Martinez iyo qoyska guddooyihii hore ee gobalka Banaadir.
Agaasimaha guud ee midawga Yurub ee horumarinta caalamiga ah Mr Stefano Manservisi ayaa munaasabadda saxiixa heshiiska ka sheegay in mashruucu uu ka qayb qaadanayo hir-gelinta hidnisihii iyo riyooyinkii nabadda iyo horumarka ee guddoomiyihii gobalka Banaadir, Eng. Yariisow.
Wasiirka Qorsheynta XFS oo munaasabadda heshiiska ka sheegay in Mashruuca Eng. Yariisow uu ka qayb qaadanayo dadaallada horumarinta dalka, ayaa caddeeyay in dhawaan la hir gelin doono si loo gaaro horumarka la hiigsanayo ayna ummadda Soomaaliyeed ay uga faa’iideysato.
Ra’iisul Wasaare Xasan Cali Khayre ayaa caddeeyay in xaqiijinta mashruuca Eng. Yariisow ee diiradda lagu saarayo uu caddeyn u yahay in dowladdu ay muhiimad siinayso guuleysiga aragtidii Guddoomiyihii gobalka Banaaadir, Eng. Cabdiraxmaan Cumar Cusmaan.
Xafiiska Halqaran.com, Muqdisho
Halqarannews@gmail.com
