Muqdisho (Halqaran.com) – Xoghayaha joogtada Wasaaradda Arrimaha Dibadda iyo Iskaashiga Caalamiga ee Soomaaliya danjire Maxamed Cali Nuur Xaaji, ayaa ku qaabilay xafiiskiisa wasaaradda, wafdi ka socda Wasaaradda Arrimaha Dibadda Boqortooyada Sacuudi Carabiya oo uu hoggaaminayay lataliye Abdusalam bin Abdullahi bin Rashud Al Anzi.
Danjire Maxamed Cali Nuur, ayaa soo dhaweeyay wafdigan ka socday Sacuudiga, isagoo caddeeyay in Boqortooyada Sacuudi Carabiya ay tahay dowlad walaal ah oo xiriir qotodheer oo ku sal go’an ilbaxnimo iyo dhaqan uu kala dhexeeyo Soomaaliya, iyadoo ah dowlad wax wadaag istiraatiijiyadeed, waxa uu bogaadiyay taageeradeeda bani’aadannimo iyo mowqifyada heer caalami ee ay ku garab istaagto Soomaaliya.
Kulankani ayaa intiisa badan diiradda lagu saaray qabanqaabada dib u furista Safaaradda Sacuudiga ee caasimadda Muqdisho, iyadoo adeegyadeedana laga soo wareejinayo caasimadda Kenya ee Nairobi, iyo xoojinta xiriirka labo geesoodka iyo iskaashiga dhinacyada kala duwan ee dano wadaagga ah oo ay ku jirto siyaasadda, dhaqaalaha, ganacsiga , dhaqanka iyo waxbarashada si looga guul keeno yididiilada iyo himilooyinka labada dal iyo Shacabka walaalaha ah.
Xafiiska wararka Halqaran.com
Halqarannews@gmail.com
