Muqdisho (Halqaran.com) – Waxaa xalay magaalada Muqdisho kulan xasaasi ah ku yeeshay xubno ka tirsan Midowga Musharaxiinta iyo qaar kamid ah madaxweynayaasha Dowlad Goboleedyada dalka ka jira waxaana kulan looga wada hadlay arrimo ku saabsan xaaladda kala guurka ah ee dalku uu ku jiro iyo shirka magaalada Muqdisho uga socda madaxda dowladda iyo Maamul Goboleedyada dalka.
Madaxweynihii hore dalka Sheekh Shariif Sheekh Axmed oo hadda ah guddoomiyaha Midowga Musharraxiinta ayaa kulanka horboodayay , waxaana ay la kulmeen madaxweynayaasha Koonfur Galbeed iyo Hirshabeelle.
Madaxweyne Sheekh Shariif ayaa la tilmaamay in madaxweynayaasha Maamul Goboleedyada uu la wadaagay sida xubnaha Midowga Musharaxiinta ay u daneynayaan ka qeyb galka shirka ka socda Teendhada Afisyooni ee lagu xalinayo arrimaha doorashooyinka.
Sidoo kale xubnaha Midowga Musharaxiinta ayaa waxa ay sheegeen in ay diyaar u yihiin in ay ka qeyb qaataan xal u helidda arrimaha cakiran ee doorashooyinka iyo in laga heshiiyo arrimaha doorashooyinka.
Kulankan ayaa kusoo aadaya xilli wali uu magaalada Muqdisho ka socdo shirka u dhexeeya madaxda dowladda iyo Maamul Goboleedyada dalka shirkaas oo looga arinsanayo arrimaha doorashooyinka.
Xafiiska wararka Halqaran.com
Halqarannews@gmail.com
