Muqdisho (Halqaran.com) – Waxaa maalintii labaad galay wadahadalka Ra’iisul Wasaaraha Xukuumadda Soomaaliya, madaxda Dowlad-Goboleedyada iyo gobolka Banaadir si ay uga xaajoodaan qabsoomidda doorashada Soomaaliya.
Furitaanka shirka ayaa si degen u qabsoomay, Ra’iisul Wasaare Maxamed Xuseen Rooble ayaa guddoomiyay maadaama 1-dii May 2021 uu la wareegay mas’uuliyadda amniga iyo doorashooyinka kadib wadahadal lagu dhammeeyay khilaafkii ka dhashay muddo kordhinta Golaha Shacabka BFS.
Shirkaan wadatashiga qaran ee arrimaha doorashooyinka Qaranka waa uu ka duwan yahay kulamadii hore, waxaana ka horeeyay furitaankiisa kulamo gaar-gaar ah oo uu Ra’iisul Wasaaraha XFS la qaatay madaxda Dowlad-Goboleedyada isaga oo weydiistay in ay ku garabsiiyaan mas’uuliyadda culus ee ka saaran qabsoomidda doorashooyinka iyo amniga.
Inta uu wadahadalka socdo waxaa lagu dejinayaa jadwal habraac u noqonaya qabsoomidda doorashooyinka Baarlamaanka iyo madaxtooyada si Dowlad-Goboleedyadu isugu diyaariyaan martigelinta ergada xildhibaannada dooraneysa iyo xubnaha xildoonka ah.
Xafiiska wararka Halqaran.com
Halqarannews@gmail.com
