Washington (Halqaran.com) – Dowladda dalka Mareykanka ayaa ka dalbatay Madaxweyne Maxamed Cabdullaahi Maxamed Farmaajo iyo Guddoonka Golaha Shacabka inay si degdeg ah u baabi’iyaan hindise sharciyeedka muddo kordhinta ahaa, kaasi oo horay Beesha caalamka ay uga hortimid.
War kasoo baxay Wasaaradda Arrimaha Dibedda dalka Mareykanka ayaa looga dalbaday labada mas’uul in ay meesha ka saaraan sharcigii baarlamaanku labada sano ugu kordhiyeen Farmaajo, sidoo kalena uu Madaxweynuhu saxiixay.
Sidoo kale Qoraalka kasoo baxay Wasaaradda Arrimaha Dibedda ee dalka Mareykanka ayaa lagu boggaadiyay Ra’iisul Wasaare Maxamed Xuseen Rooble, Madaxweynayaasha Galmudug iyo Hirshabeelle sidii ay u diideen muddo kordhinta.
Waxaana loogu baaqay Madaxda dowladda Federaalka iyo dowlad Goboleedyada inay si deg deg ah u kulmaan si loo dhammeystiro qaabka doorasho la isku raacsan yahay, lana qabto doorashooyinka baarlamaanka iyo madaxweynaha sida ugu dhaqsaha badan iyadoo lagu saleynayo heshiiskii 17-ka September.
Hadalka Maraykanka ayaa imaanaya iyadoo dhawaan maamulada Galmudug iyo Hirshabeelle ay kasoo horjeesteen muddo kororsigii Madaxweyne Farmaajo, waxaana go’aankooda soodhaweeyay Mas’uuliyiinta mucaaradka ah iyo inta badan saamileyda siyaasadda Soomaaliya.
Xafiiska wararka Halqaran.com
Halqarannews@gmail.com
