Muqdisho (Halqaran.com) – Waxaa Jimcihii maanta Degmada Yaaqshiid ee gobolka Banaadir lagu aasay, Allaha u naxariistee Madaxweynihii hore ee dalka Soomaaliya, marxuum Cali Mahdi Maxamed.
Meydka marxuum Cali Mahdi ayaa maanta diyaarad lagu keenay Magaalada Muqdisho, kadib markii uu Arbacadii ku geeriyooday isbitaal ku yaalla Magaalada Nairobi ee dalka Kenya, isagoona u dhintay Cudurka Covid-19, sida ay xaqiijiyeen qoyskiisa.
Madaxda DF Soomaaliya, Guddoonka Labada Aqal ee Baarlamaanka, Xubnaha Midowga Musharraxiinta qaarkood, Wasiirro, Xildhibaanno, Madaxweynaha Hirshabeelle, Gudoomiyaha Gobolka Banaadir, Taliyeyaasha Ciidamada Qalabka Sida, Duubabka Dhaqanka, Culimada Soomaaliyeed, ehelada marxuumka iyo qaybaha kala duwan ee bulshada ayaa meydka Madaxweynihii hore Salaadda Janaasada kula tukaday Garoonka Aadan Cadde.
Intaasi ka dib meydka Madaxweynihii hore ee dalka ayaa loo qaaday dhanka Masaajid uu ka dhisay xaafadda Towfiiq ee Degmada Yaaqshiid, halkaasoo uu horaan ka dardaarmay in lagu aaso.
Prof. Xasan Sheekh Nuur oo ka mid ah dadkii ay is garanayeen Madaxweynihii hore ayaa sheegay in uu marxuumka goob ka dhex calaamadeystay Masaajidkaasi, islamarkaana uu ka dardaarmay in lagu aaso.
Ugu dambeyn, Allaha u naxariistee Cali Mahdi ayaa xilka madaxtinimada ee dalka loo magacaabay 1991-kii, isagoona markaasi noqday Madaxweynihii 4aad ee dalka uu yeesho.
Xafiiska Wararka Halqaran.com
Halqarannews@gmail.com
