Garoowe (Halqaran.com) – Xildhibaannada Golaha Wakiillada Dowlad Goboleedka Puntland ayaa Sabtida maanta waxaa u bilaawday Kalfadhiga 47aad tan iyo 25-kii October 2020 oo ay fasax ku maqnaayeen.
Kulanka 24aad kal-fadhiga 47aad oo maanta uga qabsoomay Xaruntooda magaalada Garoowe ayaa waxaa xildhibaannada loogu qaybiyay Hindise-sharciyeedka diiwaan-gelinta Codbixiyaasha Puntland, kaas oo Golaha uu u gudbiyay Madaxweynaha Puntland Siciid Cabdullaahi Deni.
Hindise Sharciyeed hanaanka diiwaan-gelinta codbixiyaasha Puntland oo uu Madaxweyne Deni u gudbiyay Baarlamaanka Puntland ayaa waxaa diyaarinayay Guddiga ku meel gaarka ah ee Doorashooyinka Puntland ee loo soo gaabiyo TPEC.
Arbacada soo socota ee toddobaadkan ayaa waxa la filayaa in Golaha Wakiilada Puntland inay dood adag ka yeeshaan Hindise-sharciyeedka diiwaan-gelinta Codbixiyaasha Puntland ee uu u gudbiyay Madaxweyne Saciid Cabdullaahi Deni.
Maamulka Puntland ayaa waxaa xilligaan ka hirgalay nidaamka Xisbiyada, waxaana mas’uuliyiinta Maamulkaas ay sheegeen in qorshahooda uu yahay in doorashada Madaxtinimada ay noqoto mid ay dadweynaha codeeyaan ee ah qof iyo Cod.
Xafiiska Wararka Halqaran.com
Halqarannews@gmail.com
