Muqdisho (Halqaran.com) – Madaxweynaha Dowlad goboleedka Jubbaland, Mudane Axmed Maxamed Islaam (Axmed Madoobe) ayaa soo dhaweeyay Ansixinta heshiiska Doorashooyinka ee labada Aqal ee Baarlamaanka ay Sabtida maanta ah meel mariyeen.
Axmed Madoobe ayaa sheegaya, in tani dhabaha u xaarayso in lasii dardar galiyo shaqooyinka dhiman, iyadoo laga faa’iidaysanayo waayo aragnimada uu dalkeennu u leeyahay qabashada Doorashooyinka heer Federaal afartii sanaba hal mar.
“Waxaan rumays nahay in ay maanta labada aqal ee Baarlamaanku gaareen go’aan Tariikhi ah oo fursad inoo siinaya in aan sii amba qaadno waxyaabaha dhiman si Doorashadu ay ugu dhacdo jawi nabdoon oo lagu qanacsan yahay taas oo ah arrin soo socotay sanadahii la soo dhaafay ee dib u dhiska Dowladnimadeenna” ayuu yiri Madaxweynaha Jubbaland Axmed Madoobe.
Madaxweynaha Jubbaland ayaa sidoo kale sheegay, in loo baahan yahay wada shaqayn buuxda iyo deddaal hagar la’aan ah oo dhammaan dhinacyadu ay u dhan yihiin si loo wajaho mustaqbalka iyo himilooyinka shacabka Soomaaliyeed.
Ugu damebyn, Axmed Madoobe ayaa waxa uu u mahadceliyay Xildhibaannada Baarlamaanka labada Aqal ee JF Soomaaliya go’aanka Tariikhiga ah ee ay maanta gaareen.
Xafiiska Wararka Halqaran.com
Halqarannews@gmail.com
