Dhoobley (Halqaran.com) – Kooxo hubeysan ayaa waxa ay xalay laba qof oo Shacab ahaa ay ku dileen duleedka Magaalada Dhoobleey ee Gobolka Jubbada Hoose, kadibna goobta isaga baxsaday.
Labada qof ee la dilay oo ahaa dad isku qoys ah ayaa kooxaha hubeysan ay ugu tageen guryahooda, waxaana wararka la helayo ay sheegayaan in dilkaan uu salka ku haayo arrimo la xiriira aanooyin qabiil.
Ciidamo ka tirsan kuwa Dowlad Goboleedka Jubbaland ayaa ku baxay halka uu dilka ka dhacay, balse aysan ku guuleysan inay gacanta ku dhigaan kooxihii hubeysnaa ee dilka u geystay dadka Shacabka ahaa.
Waxaa maalmihii la soo dhaafay deegaanno hoosyimaada degmooyinka Dhoobley Afmadow iyo degaanka Gariley waxaa kajiray colaad Beeleedyo, waxaana habeen ka hor deegaanka Diif ee Gobolka Jubbada Hoose arrimo la xiriira aano qabiil loogu dilay hal qof, halka laba kalena loogu dhaawacay.
Si kastaba, maamulka Jubbaland ee ka arrimiya deegaannada Gobolka Jubbada Hoose ayaan weli ka hadlin dilalkaas, iyada oo dhowrkii sano ee la soo dhaafay ay degaannada Gobolkaas kusoo laab laabteen colaad Beeleedyada.
Xafiiska Wararka Halqaran.com
Halqarannews@gmail.com
