Gaalkacyo (Halqaran.com) – Taliska Qaybta Booliska Gobolka Mudug ee Puntland, ayaa shaaciyay in ay gacanta ku soo dhigeen gaari nooca loo yaqaan Probox, oo todobaad ka hor laga soo dhacay Galmudug gaar ahaanna Koonfurta Magaalada Gaalkacyo.
War qoraal oo ka soo baxay Taliska Qaybta Booliiska Gobolka Mudug, ayaa lagu sheegay in Ciidanka Booliisku ay ku guulaysteen soo qabashada Gaarigaas oo midabkiisu caddaan yahay, taargadiisuna tahay CN 721.
Laguma sheegin qoraalka Taliska, wakhtiga gacanta lagu soo dhigay Gaarigaasi, halka laga soo qabtay iyo haddii ay jirto in la qabtay ciddii soo dhacday, balse keliya waxa lagu soo koobay in Gaariga ay gacanta ku dhigeen Booliska.
Taliska Qaybta Booliska Gobolka Mudug, ayaa u mahadceliyay Shacabka ku dhaqan Magaalada Gaalkacyo, oo sida ay sheegeen wadashaqayn buuxda u muujiyay Ciidanka Booliska, si loo xaqiijiyo Amniga.
Sidoo kale, waxay ballan qaadeen in ay xoojin doonaan Wada shaqaynta Laamaha Amniga Puntland iyo Galmudug, oo ka hawlgala labada dhinac ee Gobolka Mudug, si la isaga kaashado Sugidda Amniga Gobolkaas.
Si kastaba, deeganada Galmudug ayaa wali waxaa ka jirta xaalad la xiriirta dhaca gaadiidka qaybihiisa kala duwan oo ay gaysanayaan rag Burcad ah.
Xafiiska Wararka Halqaran.com
Halqarannews@gmail.com
