Muqdisho (Halqaran.com) – Wasiirka Amniga dowlad goboleedka Galmudug, Axmed Macallin Fiqi ayaa bogaadiyay tallaabadii uu saaka qaaday Taliye Saadaq Joon, taas oo uu kaga horyimid in muddo kororsi loo sameeyo dowladda Federaalka Soomaaliya.
“Talaabada uu qaaday taliyaha gobolka Banaadir ee ciidanka Boolisku waa mid bogaadin mudan, waana mid kor u qaadaysa sumcadda Ciidamada Booliska oo waayadii danbe oo dhan dhiiqooyin lugaha loo galinayey.” Ayuu yiri wasiir Fiqi.
“Todobaadkii hore waxay ciidamada Boolisku jidadka ku celinayeen xildhibaanno si sharci darro ah loogu diidayay in barlamaanka ay tagaan, maantana qeybtii faraxsanayd maalmo ka hor ayaa la celiyey weliba ayadoo tan danbe ay heysato xujo wanaagsan oo ah in looga hortagayo go’aan qaldan oo Barlamaanka ka soo baxa in uu sabab u noqonayo dhibaatada amnidarro iyo xasilooni la’aan soo waajahda dalka.” Ayuu sii raaciyay.
Hadalka wasiir Fiqi ayaa ku soo beegmay, saacado kooban kadib markii Taliye Saadaq Joon uu sheegay in uu joojiyay kulankii Baarlamanka, kana horyimid in muddo kororsi loo sameeyo dowladda inkastoo markiiba xilka laga qaaday.
Xafiiska wararka Halqaran.com
Halqarannews@gmail.com
