Muqdisho (Halqaran.com) – Warar naga soo gaaraya Xabsiga dhexe ee Xamar, ayaa sheegaya, in galabta halkaasi ay ku dhinteen laba Askari oo ka tirsanaa Ciidamada Asluubta Soomaaliya.
Labada Askari geeridooda ayaa waxa ay ka dambeysay, kadib markii mid ka mid Askarta uu ku dhacay Boosaneer ku dhex yaallo Xarunta Xabsiga, islamarkaana Askari kale oo meesha taagnaa uu damcay inuu soo badbaadiyo, balse isagiina uu kula dhintay Boosaneerka.
Saraakiil ka tirsan Ciidamada Asluubta Soomaaliya ayaa Warbaahinta u xaqiijiyay labada Askari ee dhintay in maydkooda laga soo saaray Boosaneerkii ay ku dhaceen.
Mid ka mid Askarta geeriyootay ayaa dhawaan wuxuu ka qalin jabiyay mid ka mid Jaamacadaha ku yaallo dalka, balse ugu dambeyn maanta isaga ayaa dhintay.
Ilaa iyo hadda taliska Ciidanka Asluubta Soomaaliya wax faah-faahin kama aysan bixin labadan Askari ee Talaadada maanta ku geeriyootay Boosaneerka ku yaallo Xabsiga dhexe ee Xamar.
Xafiiska Wararka Halqaran.com
Halqarannews@gmail.com
