Leego (Halqaran.com) – Waxaa faah-faahino cusub oo dheeraad ah kasoo baxaya qaraxyo geystay khasaaro isugu jira dhimasho iyo dhaawac oo Arbacada maanta ay ka dhaceen duleedka deegaanka Leego ee Gobolka Shabeellaha Hoose.
Qaraxyadaan oo ahaa miinada nooca dhulka lagu aaso ayaa waxaa la sheegay in lala eegtay Gaadiid ay wateen Ciidamo ka tirsan kuwa dowladda Soomaaliya iyo kuwo Mareykan ah oo ku wajahnaa degaanka leego.
Dadka deegaanka ayaa waxa ay sheegeen inay maqlayeen dhawaqa jugta qaraxyada iyo rasaas xoogan oo ka dambeeysay, hayeeshee aysan cadeyn karin khasaaraha ka dhashay maadaama Goobta aan loo dhawaan karin.
Ururka Al-Shabaab ayaa sheegtay mas’uuliyada qaraxyadaas, waxaana baraha internet-ka ee taageera lagu daabacay inay qaraxyadaasi la beegsadeen Ciidamo ka tirsan kuwa dowladda ee sida gaarka ah u tababaran ee Bangaraafta iyo kuwa Mareykan ah, isla markaana ay khasaaro ku gaarsiiyeen.
Weli kama hadlin saraakiisha Ciidamada Dowladda Soomaaliya ee Gobolka Shabeellaha Hoose qaraxyadaas.
Ugu dambeyn, wararkii ugu dambeeyay oo ay helayso Halqaran.com ayaa sheegaya in xaalada ay iminka degan tahay, isla markaana Ciidamada Dowladda iyo kuwa Mareykanka ay socdaalkooda iska sii wateen.
Xafiiska Wararka Halqaran.com
Halqarannews@gmail.com
