Gaalkacyo (Halqaran.com) – Talisyada Booliska ee Maamulada Galmudug iyo Puntland ee ka hawlgala Magaalada Gaalkacyo ayaa faah-faahiyay hawlgalada ballaaran, ee weli ka soconaya Xarunta Gobolka Mudug.
Booliska Labada Maamul oo kaashanaya Ciidamada Danab iyo PSF ayaa hawlgalada ka soconaya Magaalada Gaalkacyo ku soo qab qabanaya xubno ay ku tuhmayaan Shabaabnimo.
Taliye Qaybeedyada Booliska ee Gobolka Mudug ee Puntland iyo Galmudug G/sare Muumin Cabdi Shire iyo G/dhexe Qaasim Shirdoon Cali ayaa sheegay in hawlgalada ay si wanaagsan uga soconayan magaalada.
Labada taliye ayaa si isu mida u sheegay in intii ay hawlgalada socdeen lagu soo qab qabtay xubno si dhow loola xiriirinayo Ururka Al-Shabaab, kuwaa oo sida ay sheegeen baaris ku socoto.
Taliyeyaashu waxaa ay intaa ku dareen in ay sii socon doonaan hawlgalada safka ballaaran, ee siyaabooyinka kala duwan looga sameynayo xaafadaha Magaalada Gaalkacyo ee Gobolka Mudug.
Wasiirka Amniga Galmudug, Axmed Macalin Fiqi iyo Wasiiru Dowlaha Wasaaradda Cadaaladda Puntland, Ilyaas Cabdi Maxamed ayaa waxay boggaadiyeen hawlgalada lagu xaqiijinayo amniga guud ee magaalada.
Hawlgalada Gaalkacyo oo bilowday dabayaaqadii bishii Ramadan ayaa lagu soo qab qabtay dad fara badan, iyadoo illaa iyo haataan aysan jirin cid maxkamad la horkeenay.
Ugu dambeyn, waxaa jira warar sheegaya in dhalinyarada hawlgalada lagu qab qabanayo si xun loogu jirdilo xabsiyada magaaladaasi ku yaala, xilli dhalinyarada ay u badan yihiin kuwii deegaanka u dhashay.
Xafiiska Wararka Halqaran.com
Halqarannews@gmail.com
