Hargeysa (Halqaran.com) – Wasiirka Wasaaradda Warfaafinta, Dhaqanka iyo Wacyigelinta Somaliland Mudane. Saleebaan Yuusuf Cali Koore, ayaa sheegay in xanuunka COVID-19 uu soo gaaray Somaliland, sidaa darteed waxa uu bulshada u soo jeediyey in ay qaataan fariimaha guddiga heer qaran ee ka hortaga xanuunka COVID19.
Wasiir Saleebaan Yuusuf Cali Koore ayaa xusay in cudurku oo soo gaaray magaalooyinka Hargeysa, Burco iyo Berbera, waxana uu yidhi “Maanta Xanuunku Hargeysa, Burco iyo Berbera wuu jooga ee is ilaaliya oo salaanta, isku soo dhawaashaha iyo gacan qaadka joojiya, qof ayaa dilli kara boqol qof isaga oo aan ogayn ama aan masuuliyad iska saarin marka aynu qaadno tallada dhakhaatiirta”
“Dad ayaa tijaabadooda la wadaa wayna badan tahay, labadii qof ee hore waynu xaqiijinay inuu hayo, bahalkii (Corona) wuxuu inala jooga degelka ee yaynaan is diidsiin.‘‘ ayuu hadalkiisi intaasi raaciyay Saleebaan Yuusuf Cali Koore
Wasiir Koore ayaa waxa uu bulshada u soo jeediyey in ay qaataan farriimaha guddiga heer qaran ee ka hortaga xanuunka COVID-19.
Wasiirka Warfaafinta ayaa ka mid ah guddiga u diyaargarowga ka hor-tagga Coronavirus ee Somaliland.
Xafiiska Wararka Halqaran.com
Halqarannews@gmail.com
