Dhuusamareeb (Halqaran.com) – Kaddib markii amniga magaalada Dhuusamareeb ay la wareegeen ciidamo ka socda dowladda federaalka Soomaaliya ayaa waxaa magaalada lagu qabtay kulan looga hadlay amniga, kulankaa oo uu shir guddoominayey ra’iisul wasaare Xassan Cali Kheyre.
Ajandayaasha shirka looga hadlay ayaa ahaa qorshaha sugidda amniga caasimadda Galmudug ee Dhuusamareeb, diyaar garowga sugidda amniga shirka dib-u-heshiisiinta Galmudug, Amniga garoonka diyaaraha Dhuusamareeb iyo sidoo kale dardargelinta qorshaha xoraynta deegannada Galmudug ee ay Al-Shabaab kaga suganyihiin.
Ra’iisul Wasaare Kheyre ayaa hay’adaha ku shaqada leh amniga faray in iyaga oo wadajira ay kalsoonida bulsahda sare u qaadaan, sida ugu habboonna uga soo baxaan mas’uuliyadda weyn ee loo dhiibay si ay guul ugu dhammaadaan qorshaha lagu dhisayo hey’adaha dowladeed ee Galmudug.
Amniga Dhuusamareeb ayaa waxaa si rasmi ah ula wareegay laamaha amniga ee dowladda Soomaaliya, iyadoo magaaladu ay isu diyaarineyso martigalinta shirka dib u heshiisiinta beelaha dega maamulka GalMudug, si ugu dambeyn loo suura galiyo doorasho madaxtinimo oo halkaas ka dhacda.
Xafiiska Halqaran.com, Muqdisho
Halqarannews@gmail.com
