Baydhabo (Halqaran.com) – Ra’iisul Wasaaraha XF Soomaaliya Mudane Maxamed Xuseen Rooble ayaa furay shirka Guddiga Farsamada ee qaban qaabada shirka Wadatashiga Qaran oo kulankoodii ugu horreeyay ku yeeshay magaalada Baydhabo.
RW Rooble oo habka fogaan aragga uga qeyb galay shirka ayaa guddiga kula dardaarmay in ay si hufan oo daacadnimo ah u gutaan shaqada loo igmaday.
Wuxuuna kula dardaarmay Guddiyada in ay keenaan xal buuxa oo ku aadan shirka wadatashiga dowladda dhexe iyo maamulada.
Dowladda Federaalka, Dowlad Goboleedyada iyo Gobolka Banaadir ayaa magacaabay min laba xubnood oo Guddiga Farsamada ah, si ay u qaban-qaabiyaan shirka wadatashiga ee looga hadlayo arrimaha doorashooyinka ee dalka.
Sidoo kale, guddiga ayaa go’aan ka soo saari doono halka lagu qabanayo shirka wadatashiga, haddii uu horaan muran ka dhashay goobta ay tahay in lagu qabto.
Ugu dambeyn, Ra’iisul Wasaaraha XF Soomaaliya, Maxamed Xuseen Rooble ayaa sidoo kale u soo jeediyay in dhinacyda kala duwan ay muujiyaan tanaasul si loo gaaro xal.
Xafiiska Wararka Halqaran.com
Halqarannews@gmail.com
