Muqdisho (Halqaran.com) – Ciidamada Booliska Dowladda Federalka Soomaaliya ayaa Magaalada Muqdisho waxa ay ku gubeen qaad fara badan oo lagu qabtay ganacsato Soomaaliyed.
Jaadkaan ayaa waxaa Muqdisho la soo galiyay Afartii Bishan, waxaana sida Booliska ay sheegeen dhac u gaystay maleeshiyaad hubaysan, kadib markii Doon lagu soo galiyay qaadka Magaalada, balse Ciidamada Booliska ayaa dib uga soo celiyay maleeshiyaadkii dhacay qaadka.
Afhayeenka Ciidanka Booliska dowladda Captain Sadiiq Doodishe oo la hadlay warbaahinta ayaa waxa uu tilmaamay in qaadka la gubay uu ahaa Lix Jawaan ayna marka hore horgeeyeen Maxkamadda Gobolka Banaadir iyo xafiiska xeer ilaalinta Qaran, iyadoo Go’aan soo baxay lagu gubay qaadkaas oo si sharci darro ah loo soo geliyay Muqdisho.
Captain Doodishe ayaa Digniin u diray dadka qaadka ka Ganacsada, isla markaana keena Muqdisho xili dowladda u mamnuucday keenistiisa sababo la xiriira faafida Cudurka COVID-19, wuxuuna xusay in wixii Maanta ka dambeeya cidii lagu qabto qaad sharciga la hor-geyn doono.
Si kastaba, marka laga soo tago hadalka ka soo yeeray Booliska, waxaa jirta in Suuqyada Magaalada Muqdisho oo lagu iibiyo qaadka, islamarkaana Magaalada ay soo galiyaan oo ay illaaliyaan Ciidamada dowladda.
Xafiiska Wararka Halqaran.com
Halqarannews@gmail.com
