Garowe (Halqaran.com) – Puntland ayaa Sabtidii maanta shaacisay inay karantiileen dad looga shakiyay Coronavirus, kuwaasi oo ku sugan Magaalada Garowe ee Xarunta Puntland.
Wasiir Ku xigeenka Wasaaradda Caafimaadka Puntland Cabdinaasir Yuusuf Xaaji oo Warbaahinta kula hadlay Magaalada Garowe ayaa waxaa uu sheegay inay gacanta ku dhigeen 5 Ruux oo 4 ka mid ah ay yihiin Ajaanib u dhashay dal kale, halka kan kalena uu yahay Ruux Soomaali ah, kuwaasi oo la geeyay Xarun gooni ah oo loogu talagalay in dadka lagu karantiilo.
Cabdinaasir Yuusuf Xaaji ayaa sheegay in dadkaas ay baaritaano ku socdaan uuna baaritaankaas qaadan karo muddo saddex maalmood, isla markaana xaaladooda Caafimaad dadkaas ay wanaagsan tahay.
Wasiir Ku xigeenka Caafimaadka Puntland ayaa sidoo kale waxa uu sheegay shantaan ruux in lagu arkay Astaamo muujinaayo Covid-19, balse baaritaanka wax waliba ay ku cadaan doonaan.
Caabuqa Coronavirus ayaa walaac xoog leh wuxuu ku hayaa Caalamka, kadib markii si deg deg ah dunida uu ugu faafay, dad badana ay u dhinteen.
Dalka Soomaaliya ayaa illaa iyo hadda waxaa laga diiwaangeliyay dad gaaraya Saddex ruux oo mid ka mid uu yahay shaqsi Ajnabi ah oo ku sugan xerada Xalane.
Xafiiska Wararka Halqaran.com
Halqarannews@gmail.com
