Muqdisho (Halqaran.com) – Diyaarad siday saddexdii oday dhaqameed ee ka soo jeeday beesha reer Xaaji Saleemaan ayaa Talaadadii maanta ka soo degtay garoonka diyaaradaha ee Aadan Cadde ee Muqdisho, kuwaa oo dhawaan degmada Xarardheere ee G/Mudug heshiis kula soo galay Ururka Al-Shabaab.
Odayaashaan oo lagu kala magacaabo Sugaal Warsame Cali, Caliyare Axmed Xeyle iyo Cumar Maxamed Jimcaale ayaa maalmihii la soo dhaafay ku xirnaa Magaalada Dhuusamareeb, kadib markii laga soo xiray magaalada Cadaado.
Maalmo ka hor ayaa Saddexda Oday ay ka soo muuqdeen Warbaahinta, iyaga oo kula hadlay magaalada Cadaado, waxaana ay sheegeen in sababta ay heshiiska ula galeen Ururka Al-Shabaab ay aheyd, inay ka soo badbaadinayeen ku dhawaad 70 Ruux oo ay Al-Shabaab si xoog ah uga heysteen Beesha.
Wasaaradda Amniga Maamulka Galmudug iyo taliska qeybta 21aad ayaa dhawaan si wadajir ah u sheegay in tallaabo sharci ah laga qaaayo cid kasta oo la macaamisha Ururka Al-Shabaab, taas oo keentay in Odayaashan la soo xiro, Muqdishana loo soo gudbiyo.
Talaadadii Maanta ayaa magaalada Muqdisho la keenay Saddexda Oday si loogu maxkamadeeyo, kadib markii Hay’adaha Amniga Maamulka Galmudug ay ku soo wareejiyeen DF Soomaaliya.
Xafiiska Wararka Halqaran.com
Halqarannews@gmail.com
