Daynuunaay (Halqaran.com) – Saraakiisha Ciidamada Xoogga dalka Soomaaliya ayaa faah faahin ka bixiyay dagaal culus oo Ciidamada dowladda iyo Al-Shabaab shalay ku dhexmaray deegaanka Daynuunay oo ka tirsan Gobolka Baay.
Dagaalkii shalay ayaa wuxuu ka dambeeyay, kadib markii ciidamada Shabaab ay weerar ku qaadeen Xerada Ciidanka Daynuunay, halkaasi oo saacado ay la wareegeen, ayna ku dileen Ciidamo ka tirsan dowladda.
Taliyaha qeybta 60-aad ee Ciidanka Dowladda Janeraal Maxamed Sheekh Cabdulaahi ayaa in Al-Shabaab ku gaarsiiyeen dagaalkii dhacay khasaaro xoogan, isla markaana ay ka dileen 17 Xubnood oo uu ka mid yahay Sarkaal Al-Shabaab u qaabilsan Gobolka Baay,kaas oo uu Magaciisa ku sheegay Cabdicasiis Isaaq Nuuroow (Abuu Yaxye).
Janeraal Maxamed Sheekh Cabdullaahi ayaa waxa uu sheegay dhinaca ciidamada dowladda dagaalkaasi inay uga dhinteen Saddex Askari iyo Sarkaal ka tirsanaa Ciidamada Xoogga dalka.
Ururka Al-Shabaab ayaa baraha internet-ka ee wararka ay ku faafiyaan waxa ay ku sheegteen guulo inay ka gaareen dagaalkaasi oo ay ku dileen xubno badan oo ka tirsanaa Ciidamada Xoogga dalka.
Xafiiska Wararka Halqaran.com
Halqarannews@gmail.com
