Balanballe (Halqaran.com) – Ciidanka Dowladda Federaalka Soomaaliya iyo kuwa Maamulka Galmudug ayaa tan iyo xalay waday hawlgallo ay ku baadigoobayaan ragii ka dambeeyay dil wadareed duleedka degmada Balanballe loogu gaystay saraakiil ka tirsanaa Ciidamada milateriga Soomaaliya.
Howlgalka oo laga sameeyay wadada xiriirisa Magaalooyinka Guriceel & Balanballe ayaa intii ay ku jireen Ciidamada waxaa la sheegay inay gacanta ku dhigeen mid kamid ah maleeshiyaadkii ka dambeeyay weerarkaas kaas oo watay qoray AK47 ah.
Madaxweyne ku-xigeenka Maamulka Galmudug Cali Daahir Ciid ayaa xaqiijiyay qabashada Ninkaas, waxaana uu sidoo kale sheegay in Ciidamada ay soo heleen laba Sarkaal oo la weysanaa, isaga oo u tacsiyadeeyay Saraakiishii ka tirsanaa Ciidamada Milateriga Soomaaliya ee weerarka lagu dilay.
“Anigo ku hadlaya magaca Madaxtooyada Galmudug waxaan mar labaad tacsi u diraya Ciidamada Xoogga dalka Soomaaliya iyo dhammaan qoysaska ay ka baxeen iyo qaraabada, waxaan Allah ka baryaa in uu Samir iyo iimaan naga Siiyo dhamaanteen‘‘ ayuu yiri Cali Daahir Ciid.
Saraakiisha ka tirsanaa Ciidamada Milaletriga Soomaaliya ee lagu dilay weerarkii ka dhacay duleedka degmada Balanballe ee gobolka Galgaduud ayaa saakay la’aasay, iyadoo aysan jirin Madax ka tirsan Galmudug oo Aaska ka qeyb-gashay.
Xafiiska Wararka Halqaran.com
Halqarannews@gmail.com
