Muqdisho (Halqaran.com) – Guddiga u xil saaray aaska Allaha u naxariitee, madaxweynihii hore ee Soomaaliya, Cali Mahdi Maxamed, ayaa sheegay in maalinta Jimcaha oo berri ah la keeni doono meydka madaxweynaha, laguna aasi doono magalaada Muqdisho.
Guddoomiyaha gobolka Banaadir ahna Duqa magaalada Muqdisho Cumar Maxamed Maxamuud (Cumar Filish) oo guddigaas ka mid ah ayaa sheegay in shaqada guddiga ay tahay diyaarinta hab-maamuuska dowliga ah ee aaska qaran ee loo sameynayo madaxweyne Cali Mahdi Maxamed.
Allah u naxariitee, Cali Mahdi Maxamed ayaa ku geeriyooday xalay isbitaal ku yaala magaalada Nairobi ee dalka Kenya, isagoo da’diisu tahay 82 sano jir.
Ra’isul wasaaraha Soomaaliya ayaa guddi ka kooban 11 xubnood oo ay kamid yihiin; wasiiro, xildhibaano iyo guddoomiyaha gobolka Banaadir u xil saaray qaban qaabada aaska Allah u naxariitee, Cali Mahdi Maxamed.
Ugu dambeyn, madaxweyne Maxamed Cabdullaahi Farmaajo ayaa ku dhawaaqay in saddex maalin oo baroor-diiq ah loo sameyn doono, isla markaana Calanka Jamhuuriyadda hoos loo dhigi doono, si loo maamuso madaxweyne Cali Mahdi Maxamed oo ahaa madaxweynihii 4-aad ee Soomaaliya.
Xafiiska Wararka Halqaran.com
Halqarannews@gmail.com
