Minneapolis (Halqaran.com) – Derek Chauvin oo ah askari horay uga tirsanaa booliska magaalada Minneapolis, kuna eedeeysnaa dilka George Floyd oo ahaa nin madow ayaa maanta lagu helay dhammaan danbiyadii lagu soo oogay.
Chauvin ayaa lagu helay saddex danbi oo kala ahaa, darajada labaad ee dil aan qasdi aheyn, darajada saddexaad ee dil ula kac ah iyo darajada labaad oo ah dil aan ula kac aheyn.
Galabta xilliga magaalada Mineapolis, markii ay guddigi xeer-beegtida aheyd ay ku dhawaaqeen go’aankooda oo ahaa in Derek Chauvin uu danbiile yahay, ayaa markiiba waxaa bannaanka maxkamadda ka billowday dabaaldag ay sameeyeen ehelka iyo taageerayaasha George Floyd iyo dadka u dhaq-dhaqaaqa xuquuqda bulshada madow.
Floyd ayaa sannadkii hore u dhintay neef-xiran, kaddib markii uu muddo 9 daqiiqo ah uu surka jilibkiisa ugu taakeeyay Derek Chauvin oo markaasi ahaa askari ku jira waajibaadkiisi shaqo.
Muuqaalkii laga duubay dhacdada ayaa kiciyay, mudaharaadyo ruxay Mareykanka lagana dareemay inta badan caalamka.
Chauvin ayaa la xiray kaddib markii lagu dhawaaqay xukunkiisa, iyadoo garsooraha maxkamadda degmada Hennepin uu laalay damaanaddii uu bannaanka ku joogay, wuxuuna sugi doonaa ciqaabta dambigii lagu helay, kaas oo siddeed toddobaad kaddib lagu dhawaaqi doono.
Xafiiska wararka Halqaran.com
Halqarannews@gmail.com
