Muqdisho (Halqaran.com) – Ra’iisul Wasaaraha Xukuumadda Federaalka Soomaaliya Maxamed Xuseen Rooble oo maalmiihii lasoo dhaafay kulamo ka waday magaalada Muqdisho kuwaas oo looga hadlayey sidii loo dhameyn lahaa khilaafka ka taagan doorashada Soomaaliya ayaa maanta kulan gaar ah la qaatay guddoomiyaha golaha aqalka sare ee BFS Cabdi Xaashi Cabdullaahi.
Ra’iisul Wasaare Maxamed Xuseen Rooble kulankaasi sida lagu sheegay qoraal kooban oo kasoo baxay xafiiska Rooble waxa uu ku soo dhamaaday is-afgarad kaas oo inta badan diiradda lagu saaray arrimaha doorashada oo xilligaan shir laga leeyahay, shirkaas oo ay ka qeyb galayaan madaxda dowlad goboleedyada dalka iyo guddoomiyaha gobolka Banaadir.
Kulankan Ra’iisul Wasaare Maxamed Xuseen Rooble iyo guddoomiyaha golaha aqalka sare ee BFS Cabdi Xaashi Cabdullaahi ayaa kusoo aadaya iyadoo saacadihii lasoo dhaafay ay baraha bulshada wareegaysay warqad taas oo lagu sheegay in wadahadalada siyaasiyiinta kasoo jeeda gobolada waqooyi lagu wareejiyey guddoonka aqalka sare inkastoo markii dambe uu been abuur warqaddaasi ku tilmaamay Ra’iisul Wasaare ku-xigeenka dalka Mahdi Maxamed Guuleed.
Xafiiska wararka Halqaran.com
Halqarannews@gmail.com
