Dhuusamareeb (Halqaran.com) – Madaxweynaha JF Soomaaliya, Xasan Sheekh Maxamuud ayaa Khamiista maanta ah gaaray magaalada Dhuusamareeb ee caasimadda Galmudug.
Madaxweyne Xasan ayaa ka soo ambabaxay magaalada Baydhabo ee xarunta KMG ah ee maamulka Koonfur Galbeed Soomaaliya oo maalmihii la soo dhaafay uu joogay.
Wafdiga Madaxweyne Xasan Sheekh Maxamuud ayaa waxaa garoonka diyaaradaha magaalada Dhuusamareeb ku soo dhaweeyay Madaxweynaha Galmudug Axmed Cabdi Kaariye (Qoor-Qoor), Xubno kale oo kamid ah Maamulka Galmudug, Wasiirro iyo Xildhibaanno ka tirsan dowladda Federaalka iyo qeybaha kala duwan ee Bulshada.
Madaxweynaha Soomaaliya Xasan Sheekh Maxamuud ayaa kulamo kala gooni gooni la yeelan doona Madaxda Sare ee dowlad Goboleedka Galmudug, Saraakiisha Ciidamada qalabka sida iyo Odayaasha Dhaqanka Magaalada.
Safarka Madaxweyne Xasan uu maanta ku tegay magaalada Dhuusamareeb waxa uu qeyb ka yahay booqashada uu ku marayo qaar ka mid ah gobollada dalka, si uu ugu kuurgalo xaaladaha bini’aadannimo ee ka jira gobollada dalka.
Xafiiska Wararka Halqaran.com
Halqarannews@gmail.com
