Muqdisho (Halqaran.com) – Madaxweynaha JF Soomaaliya, Mudane Maxamed Cabdullaahi Farmaajo ayaa isbeddal ku sameeyay taliska Ciidanka xoogga dalka Soomaaliyed gaar ahaan taliye ku xigeenka iyo taliska Ciidanka lugta.
Farmaajo ayaa taliye ku-xiggeenka ciidanka Xoogga u magacaabay Generaal Cabaas Amiin Cali oo horay u ahaa taliyaha Ciidanka dhulka.
Taliyaha Ciidanka Dhulka ee Dowladda Federaalka ayaa loo magacaabay Generaal Maxamed Tahliil Biixi, halka taliye ku-xigeenka Ciidanka Dhulka loo magacaabay Col. Xuseen Xoosh.
Saraakiishaan oo aan la shaacin magacaabistooda ayaa maanta xilalka la wareegay, kadib Munaasabad lagu qabtay xarunta Wasaaradda Gaashaandhiga oo Taliska Ciidanka xoogga Dalka.
Madaxweynaha JF Soomaaliya Maxamed Cabdullaahi Farmaajo ayaa isbeddel joogto ah ku sameeynayay bilihii la soo dhaafay Saraakiisha Ciidanka xoogga dalka, waxaana qaar ka mid ah dadka dhalila ay sheegeen in shaqadda Ciidanka ay hakiyeen isbadalada joogtada ah.
Xafiiska Wararka Halqaran.com
Halqarannews@gmail.com
