Muqdisho (Halqaran.com) – Warar ay helayso warbaahinta Halqaran News ayaa sheegaya, in Axadda maanta ah la filayo in magaalada Muqdisho ay soo gaaraan madaxweynayaasha dowlad goboleedyada Puntland iyo Jubbaland, Saciid Deni iyo Axmed Madoobe, kaddib wafdi horudhac ah oo shalay soo gaaray Caasimadda.
Cadaadis kala duwan oo xubnaha Beesha Caalamka ay saareen madaxda maamullada Puntland iyo Jubbaland ayaa la sheegayaa inay sabab u tahay imaanshaha safarkooda Magaalada Muqdisho, si heshiis looga gaaro arrimaha doorashada.
Ciidamo gaar ah oo illaalo u noqon doona Madaxweynaha dowlad goboleedka Puntland ayaa shalay galab waxa ay soo gaareen Muqdisho, waxaana Ciidankaasi la socday xubno ka mid Prorocalka Madaxweynaha Puntland.
Madaxweynayaasha Puntland iyo Jubbaland ayaa sida la sheegay waxa ay shir la yeelan doonaan Madaxweynaha JF Somaliya, Mudane Maxamed Cabdullaahi Farmaajo, iyadoo sida la sheegay la dhammaystiri doono arrimo la xariira doorashooyinka dalka iyo sidoo kale waxyaabo quseeya siyaasadda.
Madaxda Puntland iyo Jubbaland ayaa ka maqnaa shirkii Dhuusamareeb3 ee lagu go’aamiyay nooca doorasho ee dalka ka dhici doonta, waxaana ay qaaddaceen qodobadii kasoo baxay shirkaasi, iyagoo sheegay in aan loo dhammeyn, inkastoo shirka ay Garoowe ay ku yeesheen ay kasoo saareen war-murtiyeed ay wada hadal ku dalbadeen.
Xafiiska Wararka Halqaran.com
Halqarannews@gmail.com
