Hargeysa (Halqaran.com) – Madaxweynaha Somaliland, mudane Muuse Biixi Cabdi ayaa Khamiistii maanta digniin u diray madaxda dhaqanka reer Somaliland.
Mr. Biixi ayaa dhaqanka Somaliland ugu baaqay in ay faraha kala baxaan arrimaha siyaasadda, kuna ekaadaan dhaqanka, sidaas haddii ay sameyn waayaana ay u diyaar garoobaan cawaaqib xumada ka dhalata arintaas.
“Madax dhaqameedka waxaanu ka sugaynaa oo aanu ku waaninaynaa inay ku ekaadaan dhaqankii wanaagsanaa ee ay dadka ku ilaalin jireen, hadduu ka baxo suldaanku dhaqankii wanaagsanaa iyo wixii loo xilsaartay oo uu bad kale galo, wixii baddaas kaga soo baxa ha u diyaar garoobo,” ayuu yiri Madaxweynaha Somaliland Biixi.
Madaxweynaha Somaliland, ayaa hadalkiisa ku soo aadaya, xilli maalmihii la soo dhaafay qaar kamid ah madaxda dhaqanka Somaliland ay warbaahinta ka sheegeen in wadahadallada dowladda Federaalka iyo maamulka Somaliland laga qeyb galiyo, sidoo kalana xusay in ay marnaba kala go’i karin Soomaaliya.
Si kastaba ha’ahaatee, wadahadallada dowladda Federaalka iyo Somaliland ayaa hakad ku jiray tan iyo markii uu xilka la wareegay Madaxweynaha JF Somaliya Mudane Maxamed Cabdillaahi Farmaajo.
Xafiiska Wararka Halqaran.com
Halqarannews@gmail.com
