Muqdisho (Halqaran.com) – Guddoomiyaha Gobolka Banaadir ahna duqa magaalada Muqdisho Cumar Maxamuud Maxamed (Cumar Filish) ayaa xalay booqday qoysaskii carruurta uga geeriyoodeen daadad ka dhashay roobka xooganaa ee ka da’ay magaalada Muqdisho saacadihii aan soo dhaafnay, kaas oo geystay khasaare iskugu jira dhimasho, dhaawac iyo burbur soo gaaray guryo ay qoysas ku noolaayeen.
Qoysaskaan oo gaarayey illaa saddex qoys ayuu guddoomiyuhu gaarsiiyay deeq lacag ah, isagoo dadka Soomaaliyeed ugu baaqay in la caawiyo qoysaskaan, Inta la xaqiijiyey tirada geerida ayaa haatan mareysa 13-qof oo wada carruur ah.
Sidoo kale waalidka carruurtaan ayaa duqa Muqdisho uga warbixiyay sida ay wax u dheceen, waxayna ka dalbadeen in maamulka gobolku wax ka qabto dhibaatada uu gaarsiiyey roobkii saacadihii la soo dhaafay ka da’ay magaalada Muqdisho.
Waxaa sidoo kale qoysaskaaan la kulmay madaxweynihii hore ee dalka Sheekh Shariif Sheekh Axmed, isagoo dowladda ugu baaqay inay wax ka qabato daadadka xilli roobaad kasta ku soo rogmada goobaha ay degan yihiin qoysaska danyarta ah.
Dhanka kale guddoomiyaha gobolka Banaadir Cumar Filish ayaa xalay kormeer ku tagay qaar kamid ah waddooyinka magaalada Muqdisho oo biyo badan uu dhigay roobkii ka da’ay caasimadda, isagoo waaxda howlaha guud faray inay xoojiyaan howlaha dib loogu furayo waddooyinka ay biyuhu dageen ee magaalada Muqdisho.
Xafiiska wararka Halqaran.com
Halqarannews@gmail.com
