J/hoose (Halqaran.com) – Waxaa faah-faahin dheeraad ah kasoo baxeysa qasaaraha ka dhashey duqeyn dhanka cirka ah oo dhacday deegaanno ka tirsan Gobollada Jubbooyinka laguna beegsadey Xarumo ay ku sugnaayeen Xubno ka tirsan Ururka Al-Shabaab.
Duqeymaha oo ay fuliyeen diyaarado dagaal ayaa Saraakiil ka tirsan laamaha Amniga Soomaaliya waxaa ay sheegeen in lagu dilay Sarkaalkii Madaxda u ahaa Ajaanibta Al-Shabaab, kaas oo Magaciisa lagu sheegay Sheekh Thaabit iyo saraakiil la socotey.
Sidoo kale, duqeynta 1aad oo ka dhacday degmada Jilib ayaa Saraakiisha Ciidamada Dowladda sheegeen in lala beegsadey Saddex Xarumood oo ay lahaayeen Al-Shabaab, isla markaana uu jiro khasaaro ka dhashay duqeyntaas.
Dhinaca kale, Wararka la helay ayaa sheegaya in diyaaradaha qumaatiga u kaca ee loo yaqaano Helecopter-ka ay duqeymo ka geysteen Saldhig ku yaala degmada Jamaame ee Gobolka Jubbada Hoose xilli ay Al-Shabaab isku diyaarinayeen in ay weerar ku qaadaan deegaanka Baarsanguuni, sida laga soo xigtey saraakiil ka tirsan hay`adaha Ammaanka Soomaaliya
Saraakiisha hay’adaha Amniga Soomaaliya ayaa sheegay in duqeyn ka dhacday degmada Jamaame lagu burburiyay Todobo gaari oo nooca dagaalka ah, balse aan la xaqiijin khasaaraha nafeed ee ka dhashay.
Ugu dambeyn, Mreykanka ayaa kordhiyay labadii todobaad ee soo dhaafay duqeymaha dhanka Cirka ah, xilli intooda badan Ciidamada Mareykanka ay isaga baxeen Soomaaliya.
Xafiiska Wararka Halqaran.com
Halqarannews@gmail.com
