Muqdisho (Halqaran.com) – Sii-hayaha Ra’iisul Wasaaraha dalka, Mahdi Maxamed Guuleed, ayaa Isniinta maanta ah kulan kula qaatay Magaalada Muqdisho laamaha kala duwan ee amniga dalka.
Kulanka oo looga hadlay adkeynta amniga dalka, ayaa Mahdi Guuleed waxuu laamaha amniga uga dhageystay warbixin la xariirka weerarkii shalay Muqdisho ka dhacay ee lagu qaaday Hotelka Elite ee ku yaalla Xeebta Liido.
Sii hayaha ra’iisul wasaaraha dalka ayaa laamaha amniga faray inay baaritaan saxan oo dhammeystiran ku sameeyaan dhacdadii shalay, kaasoo dad badan oo shacab iyo mas’uuliyiin isugu jira lagu laayay.
Sidoo kale, Mahdi Maxamed Guuleed ayaa ku adkeeyay laamaha kala duwan ee Amniga, in ay laba jibaaraan daddaalada lagu xoojinayo amniga dalka si ummadda Soomaaliyeed ay u helaan amni la isku haleyn karo.
DF Soomaaliya ayaa markasta ku celcelisa inay ku dadaaladayaan sidii shacabka Soomaaliyeed ay u heli lahaayeen amni iyo xasilooni waarta balse waxaa hadana dhaca weerarro lagu qaadayo xarumo dowladeed oo amnigooda si weyn loo ilaaliyo iyo hoteelada ay degan yihiin mas’uuliyiin ka tirsan dowladda.
Xafiiska Wararka Halqaran.com
Halqarannews@gmail.com
