Dhuusamareeb (Halqaran.com) – Roob xoog leh oo xalay ka da’ay qaybo ka mid ah gobolka Galgaduud ayaa sababay dhimashada afar qof oo carruur ah iyo dhaawaca laba qof oo kale oo middi ay tahay hooyadii dhashay caruurtan oo isku qoys ahaa.
Wararka laga helayo deegaanka Inamid oo qiyaastii 35 km u jira magaalada Dhuusamareeb ayaa sheegaya in qoyskan oo reer miyi ah ay ku dhacday biriq, halkaasi oo afarta carruur ay ku dhinteen.
Dhinaca kale, gudaha magaalada Dhuusamreeb ayaa waxaa sidoo kale ku dhacay dhowr biriq oo kale, hasa ahaatee wax khasaare ah lagama soo werin.
Qeybo ka mid ah Soomaaliya ayaa waxaa iminka ka da’aya roobabka gu’ga, kuwaasi oo khasaare nafeed sababay, waxaana meelaha roobabkan ay dhimashada ka sababeen ka mid ah magaalada Qardho, oo 7 qof ay ku dhinteen daadad ka dhashay roobabka.
Sidoo kale, roobabka ayaa waxa ay saameyn ku yeesheen Magaalada Baardheere ee Gobolka Gedo oo fatahaada ka dhashay roobabka ay saameeyeen Magaalada.
Ugu dambeyn, magaalooyinka ay maraan wabiyada dalka ayaa si wayn waxaa looga dareemayaa cabsi la xiriirta fatahaado ay sameeyaan Wabiyada, xilliyada roobka ay da,aan.
Xafiiska Wararka Halqaran.com
Halqarannews@gmail.com
