Addis Ababa (Halqaran.com) – Xulka Qaranka ee Soomaaliya ee da’doodu ka hooseyso 17-ka sano ayaa Sabtida maanta ah ku guuleystay koobka ciyaaraha bariga iyo bartmaha ee Cecafa ee ka dhacday magaalada Addis Ababa.
Xulka Soomaaliya ayaa 3 iyo 1 uga badiyay Xulka Koonfurta Suudaan.
RW Xamse Cabdi Barre ayaa ugu hambalyeeyay guusha weyn ee ay gaareen Kooxda Xulka Qaranka ee da’dooda ka hooseyso 17 sano.
Kooxda oo cayaarta final-kaga adkaatay South Sudan 3 — 1, ayaa Ra’iisul Wasaare Xamse uu sheegay inay umadda Soomaaliyeed u soo hooyeen guul, sharaf iyo magac.
Ra’iisul Wasaare Xamse oo habeen hore kulan dhiirigelin iyo dardaaran ah la yeeshay kooxda iyo macallinkooda, ayaa sheegay inay ka soo dhalaaleen doorkooda, shacabka Soomaaliyeed iyo Xukuumadoodana ay si heer sare ah u soo dhaweyn doonaan.
Ugu dambeyn, xulka Soomaaliya ee da’doodu ka hooseyso 17-ka sano ayaa maalmihii lasoo dhaafay wacdaro ka dhigayay tartanka, waxay kasoo badiyeen Itoobiya iyo Uganda.
Xafiiska Wararka Halqaran.com
Halqarannews@gmail.com
