Baydhabo (Halqaran.com) – Wararka naga soo gaaraya magaalada Baydhabo ayaa sheegaya in ra’iisul wasaaraha Soomaaliya Xasan Cali Kheyre oo booqasho ku jooga magaaladaasi uu dowlad goboleedka Koonfur Galbeed ku wareejiyay lacag gaareysa 150,000 oo Dollarka Mareykanka.
Lacagtaasi ayaa la sheegay in lagu horumarinayo laguna dayactirayo garoonka kubadda cagta ee Dr Ayuub Stadium ee magaalada Baydhabo.
Garoonka ciyaaraha ee Dr Ayuub ee casriyeynta lagu sameynayo ayaa qayb ka qaadanaya is-dhexgalka bulshadda, horumarinta ciyaaraha iyo soo saarista dhalinyaro leh xirfad ciyaareed wanaagsan oo qaranka ku matala tartamada caalamiga iyo kuwa heer gobol.
Wasiirka Ciyaaraha Koonfur Galbeed, Cali Dhuux ayaa Ra’iisul Wasaaraha uga mahadceliyay taageerada dhaqaale ee uu ugu deegay barnaamijka horumarinta garoonka ciyaaraha magaalada Beydhabo.
RW Xasan Cali Khayre ayaa maalin ka hor, isagoo la hadlaya kumanaan ka tirsan shacabka reer Baydhabo ayaa ballaan qaaday in la horumarinayo garoonka ciyaaraha Dr. Ayuub si dhalinyaradu ay u helaan fursad ay ku horumariyaan xirfaddooda ciyaareed.
Xafiiska Halqaran.com, Muqdisho
Halqarannews@gmail.com
