Muqdisho (Halqaran.com) – Ciidamo ka tirsan AMISOM iyo Ururka Al-Shabaab ayaa dagaal khasaaro geystay ku dhexmaray deegaanka Arbacow oo ka tirsan deegaanka Ceelasha Biyaha ee duleedka Muqdisho.
Wararka ayaa sheegaya, in dagaalkan uu yimid, ka gadaal markii xalay xubno ka tirsan Al-Shabaab ay weerareen saldhiga ciidamada AMISOM ee deegaanka Arbacow.
Dadka deegaanka ku nool ayaa ku soo warramaya in ay maqlayeen dhawaqa rasaasta ay labada dhinac isku weydaarsanayeen.
Si dhab ah looma oga inta uu la egyahay khasaaraha ka dhashay dagaalkaasi, walow xilliga dagaalka uu dhacayay ay aheyd xilli habeen oo ay dadku hurdayeen.
Xaaladda deegaanka Arbacow ayaa hadda u muuqata mid deggan, waxaana xusid mudan in dhowr jeer ay Al-Shabaab weerareen xerada ciidamada AMISOM ee deegaankaasi.
Xafiiska Wararka Halqaran.com
Halqarannews@gmail.com
