Kismaayo (Halqaran.com) – Wararka ka imaanaya Magaalada Kismaayo ee Gobolka Jubbada hoose ayaa sheegaya in maanta Garoonka Magaaladaasi ay ka dagtay diyaarad.
Kismaayo waxaa saaran xayiraad dhanka duulimaadka ah oo ay saartay dowladda Federalka Soomaaliya, waxaana arrintaasi saameyn ay ku yeelatay nolosha shacabka ku nool Magaaladaasi.
Diyaarada maanta ka dagtay Magaalada Kismaayo ayaa waxa ay ka ambabaxday Magaalada Muqdisho, waxaana wararka ay sheegayaan diyaarada inay aheyd mid faaruq ah.
Diyaarada waxaa saarnaa oo kaliya shaqaalaha ka shaqeeya gudaha diaayaradaasi iyo hawlwadeeno caafimaad.
Markii ay gaartay kismaayo waxa ay halkaasi ka soo qaaday dad shacab ah oo xanuunsanaa, kuwaasi oo lagu sii diyaariyay Garoonka diyaaradaha Magaalada Kismaayo.
Ilo wareedyo ayaa sheegaya dadka xanuunsan ee lagu soo qaaday diyaaradaasi in loo soo qaaday Muqdisho, islamarkaana la doonaayo in lagu daaweeyo Muqdisho.
Xayiraadii dowladda Federalka Soomaaliya ay saartay Magaalada Kismaayo ayaa wali saaran Magaaladaasi, waxaana arrintaasi ay saameysay dadka ku nool deeganada Maamulka Jubbaland.
Xafiiska Halqaran.com, Muqdisho
Halqarannews@gmail.com
