Muqdisho (Halqaran.com) – Hay’adda UNICEF ee Qaramada Midoobe ayaa si kulul u cambaareysay weerar lagu dilay labo ka mid ah shaqaalaha talaalka cudurka dabeysha, kaasi oo maanta ka dhacay magaalada Muqdisho.
War qoraal ah oo uu soo saaray madaxa UNICEF ee Soomaaliya, Jesper Moller ayaa lagu sheegay in UNICEF ay argaxgaxday falka lagu dilay labo xubnood oo ka mid ah shaqaalaha talaalka kuwaasi oo shaqo ku jiray.
‘‘Shaqaalahan geesiyiinta waxay naftooda halis u galiyeen in adeega caafimaadka oo ay aadka ugu baahanyihiin gaarsiiyaan caruurta nugul‘‘ ayaa lagu yiri qoraalka.
UNICEF waxay tacsi u dirtay qoyska iyo ehelka ay ka baxeen shaqaalaha gargaarka ee la dilay.
Sidoo kale, qoraalka ayaa lagu sheegay in UNICEF ay si xoog leh u cambaareyneyso weerarka fuleynimada leh ee lagu dilay shaqaalaha waxayna ka codsatay dowlada Soomaaliya baarintaan buuxa.
Xafiiska Wararka Halqaran.com
Halqarannews@gmail.com
