Dhuusamareeb (Halqaran.com) – Wararka naga soo gaaraya magaalada Dhuusamareeb ayaa sheegaya, in taliyihii ciidanka NISA ee magaaladaasi lagu dilay qarax.
Gaadiid uu la socday taliyihii ciidanka Nabad Sugidda ee magaalada Dhuusamareeb Cabdirashiid Cabdi Nuur Shiiqdoon ayaa qarax miino ah lagula eegtay meel u dhow deegaanka Ceeldheere oo 30 km u jirta Dhuusamareeb.
Mas’uuliyiin ka tirsan maamulka Galmudug iyo dadka deegaanka ayaa sheegay, in qaraxa ay ku dhinteen Taliyihii Ciidanka NISA ee Dhuusamareeb Cabdirashiid Cabdi Nuur Shiiq doon (Qooje) iyo Askar ilaalo u aheyd.
Wararka ayaa intaasi ku daraya, in qaraxa ay ku dhaawacmeen askar kale oo taliyaha la socotay, kuwaas oo dhaawacooda la geeyay magaalada Dhuusamareeb.
Weli kama aysan hadlin laamaha amniga Galmudug iyo kuwa dowladda Soomaaliya ee ka howlgala magaalada Dhuusamareeb
Maalmihii la soo dhaafay waxaa ka jiray deegaanno hoostaga magaalada Dhuusamareeb dagaallo u dhaxeeyay ciidamada dowladda iyo Al-Shabaab.
Xafiiska Wararka Halqaran.com
Halqarannews@gmail.com
