Muqdisho(Halqaran.com)-Ra’iisul Wasaaraha Xukuumadda Soomaaliya Maxamed Xuseen Rooble ayaa Shacabka Muqdisho ka codsaday in ay u dulqaataan xirnaanshaha jidadka caasimadda inta ay socoto munaasabadda caleemasaarka madaxweynaha maadaama ay dalka imaanayaan madax iyo wufuud heer sare ah.
Waxaa uu sheegay in waddooyinka Muqdisho la xiri doono laga bilaabo 10: 00 Fiidnimo ee Caawa ilaa 5:00 Galabnimo ee Maalinta Berito ah ,isla markaana Shacabka looga baahan yahay inay saacadaas dulqaataan.
Ra’iisul Wasaare Rooble ayaa yiri “Walaalayaal 9 Juun Caasimadda waxa ay marti galin doontaa; Madaxweynayaal, Ra’iisul Wasaarayaal iyo wufuud caalami ah oo ka kala imaanaya caalamka, kuwaas oo ka qeyb galaya Caleema Saarka Madaxweynaha JFS. Haddaba, si loo xoojiyo Amniga martida, waxaa laga maarmaan noqotay, in la xiro jidadka Caasimadda.”
Ra’iisul Wasaaraha Dalka Maxamed Xuseen Rooble ayaa faray Taliska Ciidanka Booliska in ay diyaariyaan gaadiid goobaha caafimaadka lagu geeyo dadka ay la soo darsaan xaaladaha caafimaad inta ay jidadku xiran yihiin.
waxaa lagu wadaa Maalinta Berri ah in ay Muqdisho ay ka dhacdo caleema saarka Madaxweynaha 10aad ee JFS Xasan Sheekh Maxamuud oo loo doortay Madaxweynaha Soomaaliya 15 May 2022.
Xafiiska Wararka Halqaran.com
Halqarannews@gmail.com
