Muqdisho (Halqaran.com) – Ra’iisul Wasaarihii hore ee Soomaaliya, Xasan Cali Kheyre ayaa Axadda maanta ah safarkiisii ugu horreeyay uga ambabaxay Magaalada Muqdisho, tan iyo markii Golaha Shacabka ay codka kalsoonida kala laabteen 25-kii Bishii July ee sanadkaan.
Warar kala duwan ayaa waxa ay ka soo baxayaan safarka Ra’iisul Wasaarihii hore ee Soomaaliya Xasan Cali Kheyre, waxaana wararka qaar ay sheegayaan in uu safaro kala duwan uu ku tegi doono qaar ka mid ah wadamada Bariga Afrika kuna hormari doono dalka Jabuuti, si uu u dardar geliyo ololihiisa doorashada.
12-kii Bishii September ee sanadkaan ayaa Ra’iisul Wasaarihii hore ee Soomaaliya Kheyre waxaa uu ku dhawaaqay in uu yahay musharax Madaxweynaha Soomaaliya doorashada soo socota.
Ra’iisul Wasaarihii hore ee Soomaaliya Xasan Cali Kheyre ayaa Saddex sano iyo barkii uu ahaa Ra’iisul Wasaaraha dalka, waxaa xukuumadiisa lagu eedeeynayay waxyaabo kala duwan halka dadka qaarkood ay aaminsan yihiin inay wax badan qabatay.
Xafiiska Wararka Halqaran.com
Halqarannews@gmail.com
