Muqdisho (Halqaran.com) – Ra’iisul Wasaaraha Xukuumadda Federaalka Soomaaliya Mudane Maxamed Xuseen Rooble ayaa kulan la qaatay Guddiga amniga doorashooyinka, kuwaas oo isugu jira Taliyeyaasha Booliiska heer Fedaraal iyo heer dowlad goboleed, Gobolka Banaadir iyo Taliska AMISOM.
Kulanka ayaa u jeedkiisu ahaa sidii loo dar-dargelin lahaa howlaha horyaalla Guddiga Amniga, isla markaana ay u xaqiijn lahaayeen hannaanka Amniga ee doorashada dalka iyo goobaha ay ka dhaceyso.
Ra’iisul Wasaaraha dalka Mudane Maxamed Xuseen Rooble ayaa xasuusiyay xubnaha guddiga Amniga mas’uuliyadda adag ee loo xil saaray in ay u gutaan si mas’uuliyadi ku dheehan tahay.
RW Rooble ayaa leh mas’uuliyadda hoggaaminta hannaanka doorashooyinka, gaar ahaan kor joogteynta iyo la xisaabtanka guddiyada kala duwan ee ka shaqaynaya doorashada.
Guddiga Amniga doorashooyinka ayaa Ra’iisul Wasaaraha warbixin ka siiyey shaqooyinka ay qabanayaan oo ay ka mid tahay in goobaha ay ka dhaceyso doorashada la geeyo ciidammo Booliis ah oo isugu jira heer Federaalka, heer dowlad goboleed iyo Booliiska AMISOM.
Xafiiska Wararka Halqaran.com
Halqarannews@gmail.com
