Garowe (Halqaran.com) – Puntland oo horay u shaacisay in la xiro Masaajidada ku yaallo deeganada Puntland cabsida laga qabo Caabuqa Coronavirus awgii ayaa waxaa soo baxay in Maamulka dib ugu laabtay go,aankaasi.
Culimadda deeganada Maamulka Puntland ayaa si adag uga dhiidhiyay amarka ka soo baxay Wasaaradda Cadaaladda Puntland ee sheegaayay in la xiro Masaajidada.
Wasiirka Cadaaladda Puntland Cawil Sheikh Xaamud, oo shalay kulan gaar ah la qaatay culimaa’udiinka masaajidda, ayaa sheegay in Maamulka ay khafiifiyeen go’aankeedii ahaa in la xiro masaajidda, si looga hortago Coronavirus.
Wasiir Xaamud, ayaa sheegay in dowladda iyo culimaa’udiinku ay isu raaceen in masaajiddu sii furnaadaan, balse la xiro musqulaha iyo goobaha lagu weesaysto ee masaajidda, islamarkaana la ilaaliyo nadaafadda, si looga hortago cudurkaas.
Sidoo kale, wasiirka ayaa sheegay, in masaajidda ku yaalla Puntland ay sii furnaan doonaan, haddii aan kiisas coronavirus ah laga helin gudaha Puntland, balse haddii kiisas cusub la arko dhammaan la xiro doono masaajidda.
Xafiiska Wararka Halqaran.com
Halqarannews@gmail.com
