Puntland (Halqaran.com) – Cabdullaahi Maxamed Xasan Wasiirka Waxbarashada DG Puntland ayaa faah-faahin ka bixiyay Imtixaan sanadeedka 2020/21 oo maanta ka billowday deegaannada DG Puntland, tirada guud ee ardayda ka qeyb galeysa sanadkaan waxa uu ku sheegay in ay gaarayaan 17,735-arday oo isugu jira fasalka 8-aad ee dugsiga dhexe iyo fasalka 12-aad ee dugsiga sare.
Wasiir Cabdullaahi ayaa ardayda dugsiga sare (Fasalka 12-aad) ee sanadkaan imtixaanka galeysa ku sheegay 5708-arday halka fasalka 8-aad tiro ahaan ay yihiin 12,027-arday sida uu sheegay wasiirka Waxbarashada DG Puntland.
“Marka aan is barbardhigno sanadkaan iyo sanadihii hore waxaa kordhay ardayda, tusaale gabdhaha ayaa aad uga kordhay fasallada 8-aad & 12-aad, kalama yaro gabdhaha iyo wiilasha maadaama la sameeyay wacyigelin,” ayuu yiri Wasiirka Waxbarashada DG Puntland.
Cabdullaahi Maxamed Xasan wasiirka Waxbarashada DG Puntland waxa uu tilmaamay in Wasaaradda Waxbarashada Xukuumadda Soomaaliya is faham ka gaareen muran sanadihii dambe ka taagnaa qaadista imtixaan sanadeedka, bixinta shahaadooyinka iyo deeqaha waxbarasho ee dibadda oo lagu qiimeeyo derajooyinka (Dhibcaha) ay ka helaan Imtixaanka.
Xafiiska wararka Halqaran.com
Halqarannews@gmail.com
