Hague (Halqaran.com) – Maxkamada ICJ ayaa ku dhawaaqday in mar kale dib loo dhigay waqtiga dhageysiga dacwadda muranka badda ee u dhaxeeya dowladaha Soomaaliya iyo Kenya.
Maxkamadda ICJ oo fadhigeedu yahay magaalada Hague ee dalka Netherlands ayaa sababta ugu weyn ku sheegtay Cudurka Coronavirus.
War kasoo baxay Maxkamada oo la gaarsiiyay dowladaha Soomaaliya iyo Kenya ayey garsoorka maxkamaddu ku sheegeen in markii ay dhageysteen codsiga dib u dhigista ee ay gudbisay Kenya, sidoo kalena eegeen xaaladda cakiran ee uu sababay Cudurka Covid-19 ay go’aansadeen in waqtiga furitaanka dhageysiga kiiska laga dhigo sanadka soo socda ee 2021-ka.
Dhageysiga dacwadda badda ee u dhaxeysa Soomaaliya iyo Kenya, ayaa si rasmi ah u billaaban doonta 15-ka bisha March ee sanadka dambe ee 2021-ka. sida ay caddeysay maxkamadda ICJ.
Xafiiska Wararka Halqaran.com
Halqarannews@gmail.com
