Muqdisho (Halqaran.com) – Dowladda Federaalka ah ee Soomaaliya, ayaa Arbacadii maanta hakisay duulimaadyadii aadi jiray magaalooyinka Kismaayo iyo Baydhabo.
Wax diyaarad ah ma jirin maanta oo u baxay labadaasi Magaalo, waxaana wararka ay intaasi ku darayaan in Garoonka Aadan Cadde lagu daadiyay ciidan badan oo dhar cad.
Dowladda Soomaaliya ayaa raadinaysa Wasiirkii Amniga Maamulka Jubbaland Cabdirashiid Janan oo ka baxsaday xabsi ay Maamusho dowladda Federalka Soomaaliya.
Waxaa jira shaki ah in Cabdirashiid Janan uu doonaayo inuu ka dhoofo Garoonka Diyaaradaha Aadan Cadde, sidaasina ay tahay sababta duulimaadyada loo hakiyay.
Qaar ka mid ah Shaqaalaha Garoonka Aadan Cadde ayaa sheegay subixii Arbacada maanta illaa iyo galabta in Ciidamo dhar cad ah Garoonka ay buuxaan oo si adag loo Koontaroolayo dadka Garoonka ka dhoofayo.
Si kastaba, wasiirkii Amniga Maamulka Jubbaland Cabdi rashiid Janan, ayaanan illaa iyo hadda la haynin raq iyo ruux halka uu ka baxay, iyadoo Jubbaland ay soo saartay walaac wayn inay ka qabto nolosha Wasiirkaasi.
Xafiiska Wararka Halqaran.com
Halqarannews@gmail.com
