Addis Ababa (Halqaran.com) – Wasaaradda arrrimaha dibadda ee Itoobiya ayaa sheegtay in la xakameeyay qorshe ballaaran ay maleeshiyaadka Ururka Al Shabaab ku doonayeen inay ku qabsadaan dhul badan.
Wasaaradda oo soo xiganeysay taliyaha ciidamada Mareykanka ee Afrika (Africom), General Steven Townsend ayaa sheegtay inay u muuqato in Itoobiyaanka ay si xooggaan uga hortaggeen isla markaana ugu guuleysteen dagaalka.
General Steven Townsend ayaa ka digay in Al Shabaab ay qorsheynayeen in weerarro fara badan ay ka geystaan Dowlad Deegaanka Soomaalida, sida ay sheegtay wasaaradda arrimaha dibadda Itoobiya oo Jimcihii shaley baahisay warbixinteeda toddobaadlaha ah.
Xubno ka tirsan Maleeshiyaadka Al-Shabaab iyo ciidanka Liyuu booliska ayaa isbuucaan dhexdiisa ku dagaallameen tuulada Laas-qurun oo u dhaw degmada Feerfeer.
Dagaalkan ayaa markii dambe qayb ka noqday militeriga Itoobiya, labada dhinacna waxay sheegteen inuu mid walba khasaare gaarsiiyay midka kale.
Xafiiska Wararka Halqaran.com
Halqarannews@gmail.com
