Muqdisho (Halqaran.com) – Maamulka Hirshabelle ayaa ka tacsiyadeeyay dilkii maanta Magaalada Muqdisho loogu gaystay Allaha u naxariistee Nabadoon Cabdiraxman Axmed Cabdulle (Qaloosh).
Nabadoonka oo ka mid ahaa waxgaradka reer HIrshabelle ayaa waxaa lagu dilay xaafadda Suuq Bacaad ee Degmada Yaaqshiid, iyadoo ay dilkiisa gaysteen rag bastoolado ku hubeysnaa.
Daa’uud Xaaji Cirro, Afhayeenka Madaxtooyada Hirshabelle ayaa qoraal uu soo saaray kaga tacsiyadeeyay geerida Nabadoon Qaloosh.
Qoraalka Cirro ayaa u qornaa:
Anigoo ku Hadlaya magaceyga Kan Madaxweynaha, Madaxweyne Kuxigeenka iyo guud ahaan Dowlad Goboleedka Hirshabelle, waxaan murugada iyo Xanuunka la qaybsanaynaa, halkaana aan tacsi tiiraanyo leh uga direyna eheladii uu ka baxay Allaha u naxariistee Nabadoon Cabdiraxman Axmed Cabdulle (Nabadoon Qaloosh).
Marxuumka waxaa uu ka mid ahaa Nabadoonada Lafdhabarka u ahaa Dowlada HirShabelle, waxaase ay maanta gacan ka xaqdaran ku dishay xaafadda Suuq Bacaad ee Degmada Yaaqshiid.
Dhammaan qoyskii iyo qaraabadii uu ka baxay marxuumka Rabi samir iyo iimaan haka siiyo, isagiina Janadiisa haka waraabiyo. AAMIIN AAMIIN AAMIIN.
Xafiiska Halqaran.com, Muqdisho
Halqarannews@gmail.com
